Kauphöllin í New York, NYSE, kannar nú áhuga markaðsaðila fyrir því að hafa opið fyrir pöruð viðskipti allan sólarhringinn alla daga vikunnar.
Samkvæmt Financial Times eru eftirlitsaðilar ekki ánægðir með hugmyndina en NYSE hefur óskað eftir viðbrögðum frá stærstu verðbréfamiðlurum Bandaríkjanna.
Hugmyndin er sögð eiga rætur sínar að rekja til gagnagreiningardeildar NYSE fremur en til stjórnar Kauphallarinnar en áhugi fjárfesta erlendis á að kaupa og selja bréf stórfyrirtækja eins og Apple og Nvidia utan opnunartíma er sagt vera meðal þess sem ýtt hafi undir hugmyndina.
Samkvæmt FT lítur NYSE svo á að hlutabréfamarkaðurinn hafi orðið dráttarvaldur í viðskiptaheiminum þar sem hægt sé að stunda viðskipti með gjaldeyri, bandarísk ríkisbréf og framvirka samninga með hlutabréfavísitölur allan sólarhringinn alla virka daga.
Þá eru rafmyntakauphallir opnar allan sólarhringinn alla daga vikunnar.
Stóraukin viðskipti almennra fjárfesta eftir Covid-19 spila einnig þátt í þessari mögulegu breytingu en snjallsímaforrit eins og Robinhood bjóða notendum upp á að kaupa og selja hlutabréf allan sólarhringinn og eru viðskiptin pöruð við þeirra eigið eignasafn eða gegnum svokölluð „dark pools“.
Skoðanakönnun sem NYSE sendi á markaðsaðila snýr að mestu að því hvernig verðbréfamiðlarar sjá fyrir sér að halda uppi næturvöktum starfsmanna ásamt því hvernig þeir sjái fyrir sér að verðmyndun yrði að nóttu til.