Jón Bjarki Bentsson, aðalhagfræðingur Íslandsbanka, segir verðbólgutölur morgunsins léttar eftir „brokkgengar mælingar“ síðustu mánuði.
Líkt og Viðskiptablaðið greindi frá í morgun hækkaði vísitala neysluverðs um 0,55% milli mánaða og mældist verðbólga 6,0% á ársgrundvelli.
Mun það vera örlítið meiri lækkun á ársgrundvelli en spár gerðu ráð fyrir en greiningardeild Landsbankans og greiningardeild Íslandsbanka spáðu því að VNV myndi hækka um 0,61% milli mánaða og verðbólga færi úr 6,8% í 6,1%.
Samkvæmt Hagstofunni hækkaði kostnaður vegna búsetu í eigin húsnæði (reiknuð húsaleiga) um 1,7% og hafði 0,32% áhrif á vísitöluna.
„Verðbólgan ekki minni frá ársbyrjun 2022. Þar skiptir líka máli að verðbólga er að hjaðna á alla undirliggjandi mælikvarða. Húsnæðisliður (1,7% mán. hækkun) er þó enn óþægur ljár í þúfu,” skrifar Jón Bjarki á X í morgun.