Verðbréfasöfn lífeyrissjóða í Bandaríkjunum hafa tekið miklum breytingum síðustu tvö ár. Samkvæmt The Wall Street Journal jókst hlutabréfaeign lífeyrissjóða til muna sl. ár er hlutabréfamarkaðurinn reyndist óvenju sterkur þrátt fyrir hækkandi vexti.
Nú eru sjóðirnir hins vegar byrjaðir að selja bréf í stórum stíl og virðast lífeyrissjóðir starfsmanna í einkageiranum vera að leita mikið í skuldabréf á meðan lífeyrissjóðir opinberra starfsmanna eru að leita önnur mið eins og eignastýringu sem og skuldabréf.
Stærsti lífeyrissjóður Bandaríkjanna, lífeyrissjóðir opinberra starfsmanna í Kaliforníu, stefnir að því að selja hlutabréf fyrir 25 milljarða Bandaríkjadali á næstunni.
Goldman Sachs áætlar að lífeyrissjóðir muni selja hlutabréf fyrir um 325 milljarða Bandaríkjadali á þessu ári, sem samsvarar um 46 þúsund milljörðum króna á gengi dagsins. Mun það vera töluverð hækkun úr 191 milljörðunum sem selt var fyrir í fyrra.
Líkt og aðrir fjárfestar vestanhafs hafa lífeyrissjóðir verið að aðlagast hávaxtarumhverfinu þar sem áhættulitlar fjárfestingar í skuldabréfum geta skilað góðri arðsemi. Væntingar um vaxtalækkanir á árinu hafa farið dvínandi er verðbólgan vestanhafs heldur áfram að vera þrálát.
Stjórn almenna lífeyrissjóðsins í New York borg, sem slökkviliðs- og lögreglumenn greiða í meðal annars, ákvað í byrjun mánaðar að minnka hlutabréfaeign sjóðsins úr 47% í 39%.
Samkvæmt WSJ ætlar sjóðurinn að fjárfesta í fasteignum og setja fé í eignastýringu. Ákvörðun stjórnarinnar er þó ekki vegna vantrausts á hlutabréfamarkaðinum heldur ákváðu borgaryfirvöld nýverið að setja þak á hlutabréfaeignir lífeyrissjóða.
Sambærileg þróun er að eiga sér stað í einkageiranum en stjórn lífeyrissjóðs starfsmanna lyfjafyrirtækisins Johnsons & Johnson ákvað nýverið að draga úr hlutabréfaeign sinni um 4%. Stjórnin ákvað að fjárfesta frekar í skuldabréfum.
Ákvörðun lífeyrissjóða um að færa fé í áhættuminni eignir gæti þó haft veruleg áhrif á ávöxtun þeirra árinu.