Elon Musk, stofnandi og forstjóri Tesla, hefur eignast 9,2% hlut í samfélagsmiðlinum Twitter en markaðsvirði eignarhlutarins nam 2,9 milljörðum dala við lokun markað á föstudaginn. Hlutabréfaverð Twitter hefur hækkað um 25% í viðskiptum fyrir opnun markaða í dag.
Musk, sem er ríkasti maður heims samkvæmt auðmannalista Forbes, er nú orðinn stærsti hluthafi Twitter. Til samanburðar þá fer Jack Dorsey, stofnandi Twitter, með 2,25% hlut í félaginu.
Musk gagnrýndi Twitter fyrir tveimur vikum síðan og spurði fylgjendur sína hvort þeir væru þeirrar skoðunar að Twitter styði við málfrelsi. Hann sagðist einnig vera að íhuga að setja á fót sinn eigin samfélagsmiðil.
„Í ljósi þess að Twitter sé í reynd orðinn einn helsti vettvangur opinberrar tjáningar grafi það undan lýðræðinu í grundvallaratriðum að ekki ríki þar tjáningarfrelsi,“ tísti Musk þann 26. mars síðastliðinn.
Given that Twitter serves as the de facto public town square, failing to adhere to free speech principles fundamentally undermines democracy.
— Elon Musk (@elonmusk) March 26, 2022
What should be done? https://t.co/aPS9ycji37