Óskýrður munur á föstum mánaðarlaunum karla og kvenna mælist 10-12% hér á landi árið 2006, samkvæmt niðurstöðum nýrrar rannsókn ar sem Hagfræðistofnun Háskóla Íslands vann í samvinnu við ParX viðskiptaráðgjöf, IBM og Samtök atvinnulífsins. Föst mánaðarlaun kvenna voru að meðaltali 18% lægri en karla, en þar af voru 6-8% skýrð með mun á menntun kynjanna, starfi, aldri eða starfsaldri.
Rannsóknin byggir á gögnum úr launabókhaldi ríflega 6.300 starfsmanna í 102 fyrirtækjum á ýmsum sviðum atvinnulífsins, en þó nær einungis í einkageiranum. Tekið er fram að rannsóknin nái ekki til ábyrgðar, frammistöðu og fjölskylduaðstæðna og sagt að vera kunni að hluta launamunarins megi rekja til þeirra þátta. Þess vegna er sagt að ekki sé hægt að fullyrða að einungis sé um kynbundinn launamun að ræða heldur geti munurinn stafað af mismunandi ábyrgð og frammistöðu.
Rannsókn Hagfræðistofnunar er nákvæmari og mun umfangsmeiri en fyrri kannanir sem gerðar hafa verið hér á landi á launamun kynjanna. Óskýrður launamunur milli kynja er nokkru minni en í mörgum nýlegum rannsóknum hérlendis og má meðal annars rekja muninn til nákvæmrar starfaflokkunar og upplýsinga um menntun starfsmanna í þessari rannsókn.
Athuganir frá Íslandi og öðrum löndum benda til þess að laun karla vaxi meira með aldri en laun kvenna. Það hefur verið skýrt þannig að konur hafi löngum tekið meiri ábyrgð á barnauppeldi og rekstri heimilis en karlar. Í gagnasafni ParX kemur fram að launamunur karla og kvenna er lítill við 24 ára aldur. Laun beggja kynja vaxa álíka mikið fram á miðjan fertugsaldurinn, en eftir það eykst launamunurinn mikið. Skýring á þessu gæti verið sú að karlar og konur innan við 35-40 ára aldur taki svipaða ábyrgð á rekstri heimilisins.
Hjá þeim sem eldri eru sé meira um að konur hafi tekið sér hlé frá vinnu vegna barnauppeldis. Starfsár kvenna á þessum aldri séu færri en jafngamalla karla og frami í vinnu minni. Þess vegna muni meira á launum kynjanna á þessum aldri en hjá þeim sem yngri eru.
