Stjórn VR hafnar kröfu um að kosning félagsins á fulltrúum þess í stjórn Lífeyrissjóðs verzlunarmanna fyrir tæpri viku verði ógilt og boðað verði til nýrra kosninga. Þetta kemur fram í ályktun sem stjórnin samþykkti á fundi sínum í gærkvöld. Morgunblaðið greinir frá.
Í tilkynningu sem hefur verið birt á heimasíðu VR, segir að það fyrirkomulag sem viðhaft hafi verið við val á fulltrúum í stjórn LV sé í fullu samræmi við reglur stjórnar VR þar að lútandi, vinnureglur félagsins og lög þess. Þá segi í áliti lögmanns VR, sem kynnt hafi verið á fundinum, að ákvörðun um tilnefningu fulltrúa félagsins í stjórn LV sé á ábyrgð stjórnar VR og að engin rök séu til að fallast á kröfu um ógildingu.