Elliði Vignisson, bæjarstjóri Vestmannaeyja, segist gefa lítið fyrir svör Landsbankans um að hafna því að veita frekari upplýsingar um þá ákvörðun að byggja höfuðstöðvar bankans við Austurhöfn í Reykjavík. Þetta segir hann í samtali við mbl.is .
Elliði kveðst fagna því að Landsbankinn hafi ítrekað að málið sé nú til endurskoðunar hjá bankanum. Það komi honum hins vegar á óvart að starfsmenn bankans og stjórn hans skuli í bréfi sínu sniðganga spurningu sem Vestmannaeyjabær beindi til þeirra.
„Þá teldi ég eðlilegast að þessi banki okkar landsmanna allra birti einfaldlega svör við þessum spurningum og veiti okkur öllum eigendum, sem eru allir landsmenn, aðgengi að þeim gögnum sem hafa verið unnin vegna þessa máls,“ segir Elliði í samtali við mbl.is.
Þá kveðst Elliði vera ósammála því að ekki sé ástæða til að fjalla um fyrirhugaða nýbyggingu á hluthafafundi. Segir hann það koma sér á óvart ef Bankasýslan, sem fer með eignarhlut ríkisins í bankanum, sé tilbúin að undirgangast það að stjórn bankans ákveði að halda ekki hluthafafund vegna málsins.
Hann segir það ekki skipta máli þótt byggingin hafi verið rædd á fyrri fundum, því nú sé málið til endurskoðunar. „Og hverjir eiga að endurskoða það ef ekki eigendurnir?“