Hlutabréf líftæknifyrirtækisins Oculis verða tekin til viðskipta í íslensku Kauphöllinni á morgun. Auðkenni félagsins á aðalmarkaði verður OCS, samkvæmt tilkynningu frá Nasdaq Iceland.
Félagið lauk 59 milljóna dala hlutafjáraukningu, sem samsvarar 8,2 milljörðum íslenskra króna, um miðjan aprílmánuð.
Arctica Finance hf. hafði yfirumsjón með skráningarferlinu og var ráðgjafi við fjármögnunina. Lögfræðilega ráðgjöf veittu lögmannsstofurnar BBA/Fjeldco, Cooley LLP og Vischer AG. Fyrirtækið lauk síðast 5,6 milljarða króna hlutafjáraukningu í júní 2023.
Félagið verður því frá og með morgundeginum tvískráð hér á landi og á Nasdaq í New York en bréf félagsins voru tekin til viðskipta þar fyrir rúmu ári síðan.
Samkvæmt Occulis hyggst félagið nýta hlutafjáraukninguna til að efla og hraða klínískum prófunum félagsins og auka við rekstrarfé sitt sem nýtist í starfseminni.
Stjórnendur Oculis gera ráð fyrir að þessi fjármögnun ásamt núverandi sjóðum félagsins, verðbréfum og skammtímafjárfestingum muni duga til að fjármagna rekstur og fjárfestingarþörf félagsins inn á seinni helming ársins 2026.
Félagið var upphaflega stofnað á Íslandi af þeim Einari Stefánssyni og Þorsteini Loftssyni árið 2003 og byggir lyfjaþróun sína á áralöngum rannsóknum íslenskra vísindamanna við Háskóla Íslands og Landspítala.
