Rósa Guðmundsdóttir hefur verið ráðin sem framkvæmdastjóri fjármála hjá fasteignafélaginu Regin og mun hefja störf í lok október. Rósa tekur við starfinu af Jóhanni Sigurjónssyni sem mun starfa áfram innan félagsins í nýju starfi. Þetta kemur fram í tilkynningu Regins til Kauphallarinnar.

Rósa hefur undanfarin fjögur ár starfað sem forstöðumaður sparnaðar og útlána á einstaklingssviði Íslandsbanka, þar sem hún bar m.a. ábyrgð á inn- og útlánum til einstaklinga sem og sölu á verðbréfum til almennra fjárfesta og séreignasparnaði bankans. Þá hefur hún á síðastliðnum árum leitt innleiðingu á stafrænum lausnum sem stutt hafa umbreytingar í einstaklingsþjónustu bankans en frá árinu 2019 hefur hún borið ábyrgð á forgangsröðun verkefna á upplýsingatæknisviði sem snúa að útlánavörum bankans.

Rósa hóf störf á alþjóðasviði Íslandsbanka árið 2004 í kjölfar framhaldnáms í Bandaríkjunum. Á árunum 2006-2016 starfaði hún sem viðskiptastjóri á fyrirtækjasviði og í fyrirtækjaráðgjöf Íslandsbanka þar sem hún vann að fjármögnun margra stærstu fyrirtækja í viðskiptum við bankann.

Þá starfaði hún sem sjóðsstjóri hjá Íslandssjóðum á árunum 2016-2017 og sat samhliða því í stjórn Allarahanda GL og sem varamaður í stjórn Ölgerðarinnar. Hún sat einnig í stjórn Borgunar árin 2011-2015.

Rósa er með M.S. gráðu í iðnaðarverkfræði og aðgerðargreiningu frá Pennsylvania State University og B.S. gráðu í véla- og iðnaðarverkfræði frá Háskóla Íslands ásamt því að hafa lokið prófi í verðbréfaviðskiptum.