?Teljum það mjög alvarlegt þegar menn ganga svona frá borðinu á síðustu stundu.?

Avion Aircraft Trading hefur sent frá sér tilkynningu vegna fréttar þess efnis að Icelandair Cargo, dótturfélag Icelandair Group hafi nú horfið frá samningi um fraktflugvélar við félagið.

Það segir að í maí 2007 hafi Avion Aircraft Trading (AAT) gengið frá viljayfirlýsingu við Icelandair Group um leigu á tveimur og kaup á tveimur nýjum Airbus A330-200 fraktvélum og áttu þær að afhendast Icelandair Cargo og Icelease árin 2010 og 2011.

„Frágangur leigu- og kaupsamninga hefur staðið yfir undanfarna mánuði og voru nú á lokastigi eftir mikla vinnu beggja aðila. Því kom það AAT verulega á óvart að Icelandair Group skyldi falla frá þessum samningum á síðustu stundu og eru það ákveðin vonbrigði því samþykki stjórnar Icelandair Group lá fyrir vegna viljayfirlýsingarinnar og hefur verið unnið að lokafrágangi samninga í góðri trú,“ segir í tilkynningu AAT.

„Það hafa orðið breytingar á hluthafahópi og í stjórn sem og forstjóraskipti hjá Icelandair Group frá því að þetta ferli hófst. Hefur það umrót væntanlega gert útslagið í þessu máli. Við munum fara nákvæmlega yfir okkar rétt. Við teljum það mjög alvarlegt þegar menn ganga svona frá borðinu á síðustu stundu með skömmum fyrirvara.

Við munum nú bjóða þessar vélar til annara aðila sem hafa sýnt þeim áhuga.Við höfum í rauninni ekki áhyggjur af því að geta ekki leigt eða selt vélarnar. Það eru hins vegar vonbrigði að hafa eytt svo miklum tíma til einskis í góðri trú og um leið haldið öðrum flugfélögum frá vélunum á sama tíma,“ segir Davíð Másson forstjóri AAT í tilkynningunni.

Þá kemur einnig fram að ákvörðun Avion Aircraft Trading um kaup á þessum vélum byggðist á mjög hagstæðu kaupverði og spám um vöxt í fraktflutningum í heiminum.

„Sömu spár telja þörf fyrir meira en 400 fraktvélar af þessari burðargetu næstu 20 árin. Airbus A330-200 fraktvélin er eina vélin í sínum stærðarflokki sem getur borið 64 tonn með 7.400 km hámarks flugdrægi og hámarks burðargetu upp á 69 tonn með 6,000 km flugdrægi. Yfir 60 flugfélög reka í dag farþegaútgáfuna sem auðveldar viðkomandi flugfélögum að taka fraktútgáfuna í notkun.“

Avion Aircraft Trading var stofnað í apríl 2005 og hefur keypt og selt 43 flugvélar, aðallega Airbus A300-600, Boeing 747-400 og nýjar Boeing 777 fraktvélar sem síðan voru seldar aftur á markaði.