Valgerður Sverrisdóttir, þingmaður Framsóknarflokks og fyrrverandi ráðherra og varaformaður flokksins, ætlar ekki að bjóða sig fram til þings í komandi kosningum. Þar með hættir hún afskiptum af stjórnmálum.
Þetta kemur fram á bloggi hennar í dag.
Valgerður segir þar að ung og glæsileg kynslóð hafi tekið við forystu í Framsóknarflokknum. „Ég efast ekki um að með þetta öfluga fólk við stjórnvölinn á Framsóknarflokkurinn alla möguleika á að eflast og skila góðu verki í þágu þjóðarinnar," skrifar hún á blogginu.
„Við þessar aðstæður er eðlilegt að við sem lengi höfum verið ráðherrar og frambjóðendur fyrir Framsóknarflokkinn stígum til hliðar og gerum mögulega nauðsynlega endurnýjun og kynslóðaskipti í stjórnmálunum."
Blogg Valgerðar má finna hér.
