Á næstu klukkustundum ræðst hvort tekst að bjarga Scandinavian Airlines - SAS frá gjaldþroti. Stjórnendur flugfélagsins hafa alla helgina fundað um niðurskurð í rekstri félagsins og breytingar á kjaramálum starfsmanna þess.
„Það eru 50% líkur á árangri" sagði Eivind Roald aðstoðarframkvæmdastjóri sölu- og markaðsmála hjá félaginu fyrir nokkrum mínutum í samtali við norska dagblaðið Aftenposten.
Litlar fréttir hafa verið af gangi mála og hafa fulltrúar starfsmanna kvartað undan því í dönskum fjölmiðlum að lítið samráð hafi verið í dag. Til að mynda sagði fulltrúi flugliða seinnipartinn í dag í samtali við danska viðskiptablaðið Börsen að engin viðbrögð hefðu fengist við tilboði þeirra sem skilað var inn kl 10 í morgun, á dönskum tíma.
SAS rekur 138 flugvélar og eru áfangastaðir félagsins í kringum 90. Stærstu eigendur flugfélagsins eru sænska ríkið, danska ríkið og norska ríkið.
Hér má sjá stærstu hluthafa félagsins og hlutafjáreign í %:
- Sænska ríkið 21.4%
- Danska ríkið 14.3%
- Norska ríkið 14.3%
- Knut og Alice Wallenberg sjóðurinn 7.6%
- Försäkringsaktiebolaget, Avanza Pension 1.5%
- A.H Värdepapper AB 1.4%
- Unionen 1.4%
- Seðlabanki Danmerkur 1.4%
- Robur Försäkring 0.9%
- Ponderus Försäkring 0.8%
- Andra AP-fonden 0.5%
- Tredje AP-fonden 0.5%
- SSB+TC Ledning Omnibus FD No OM79 0.5%
- Nordnet Pensionsförsäkring AB 0.4%
- Swedbank Robur Sverigefond 0.4%
- Swedbank Robur Sverigefond Mega 0.3%
- JPM Chase NA 0.3%
- AMF Aktiefond Småbolag 0.3%
- JP Morgan Bank 0.3%
- KPA Pensionsförsäkring AB 0.2%
- Nomura International 0.2%
