*

mánudagur, 30. nóvember 2020
Erlent 21. janúar 2020 22:01

Boeing býst ekki við Max fyrr en um mitt árið

Boeing á ekki von á að 737 Max flugvélunum verði hleypt í loftið á ný fyrr en um mitt þetta ári.

Ritstjórn
epa

Boeing gaf út yfirlýsingu í dag um að félagið búist ekki við að 737 Max flugvélunum verði hleypt í háloftin af bandarískum flugmálayfirvöldum fyrr en um mitt árið 2020. Því verði flugvélunum ekki hleypt á loft fyrr en í júní eða júli. Það er þremur mánuðum síðar en Boeing hafði áður ráðgert. Heimildarmaður Seattle Times innan Boeing segir flugvélaframleiðandann nú ætla að hafa vaðið fyrir neðan sig og flugvélunum verði mögulega hleypt fyrr í loftið. 

Kyrrsetningin sem staðið hefur frá því í mars 2019 hefur haft talsverð áhrif á íslenska ferðaþjónustu enda var Icelandair um það bil að taka fjölda slíkra flugvéla í notkun þegar kyrrsetningin var sett á. Icelandair hafði einnig ráðgert að flugvélarnar nýttust í sumaráætlun þessa árs en nú er óvíst hvort það náist. Síðast gaf Icelandair út að ekki væri búist við að hægt væri að nota 737 Max flugvélarnar fyrr en í maí.

Boeing hefur stöðvað framleiðslu vélanna en áætlað er að bætur sem félagið þarf að greiða flugfélögum vegna seinkana nemi milljarði dollara á hverjum mánuði sem seinkar að koma vélunum í loftið.

Stikkorð: Boeing Icelandair 737 Max