Héraðsdómur Reykjavíkur telur ekki efni til að vísa frá 3. lið í ákæru ákæruvaldsins á hendur sakborningum í Stím-málinu svokallaða, að því er segir á mbl.is.
Ákæruliðurinn fjallar um kaup á skuldabréfum fyrir meira en milljarð króna í Saga Capital af hálfu fjárfestingasjóðs sem var í vörslu Glitnis.
Verjendur óskuðu eftir frávísun á ákæruliðnum vegna þess að lögregla hefði eytt símtölum, sem hefðu getað haft mikla þýðingu fyrir sönnunarstöðu ákærðu í málinu. Héraðsdómur Reykjavíkur féllst ekki á þessi rök.
Lárus Welding, fyrrverandi bankastjóri Glitnis, Jóhannes Baldursson, fyrrverandi framkvæmdastjóri markaðsviðskipta Glitnis, og Þorvaldur Lúðvík Sigurjónsson, fyrrverandi forstjóri Saga Capital eru ákærðir fyrir umboðssvik og hlutdeild í umboðssvikum í tengslum við lánveitingu til Stím sem nam tugum milljarða króna.
