*

þriðjudagur, 25. janúar 2022
Innlent 31. október 2021 23:09

Fyrirvörum kauptilboðs aflétt

Sp/f Orkufelagið hefur uppfyllt gildandi fyrirvara kauptilboðs gagnvart Skeljungi vegna P/F Magn.

Ritstjórn
Jón Ásgeir Jóhannesson, stjórnarformaður Skeljungs.
Eyþór Árnason

Færeyska félagið Sp/f Orkufelagið hefur nú lýst því yfir gagnvart Skeljungi að fyrirvarar kauptilboðsins varðandi fjármögnun og áreiðanleikakönnun hafi ýmist verið uppfylltir eða að fallið sé frá þeim. Þetta kemur fram í kauphallartilkynningu en þann 2. september síðastliðinn var tilkynnt um að Skeljungur hefði tekið ákvörðun um að ganga til einkaviðræðna við Sp/f Orkufelagið, félag undir forystu Ben Arabo, Teits Poulsen og Tommy Næs Djurhuus, um sölu á öllu hlutafé í dótturfélagi Skeljungs í Færeyjum, P/F Magn, á grundvelli tilboðs Sp/f Orkufelagsins.

Fram kemur að söluverð P/F Magn sé óbreytt frá fyrri tilkynningu og nemi DKK 615 milljónum, eða um 12,3 milljörðum íslenskra króna. Þá hafi Skeljungur samþykkt að taka þátt í fjármögnun Sp/f Orkufélagsins, með þeim hætti að allt að 23% heildarsöluverðs í viðskiptunum verði endurfjárfest í Sp/f Orkufélaginu og með því eignist Skeljungur allt að 49% eignarhluta í Sp/f Orkufelaginu.

Áhrif viðskiptanna á efnahag Skeljungs samkvæmt ofangreindu eru áætluð þau að nettó vaxtaberandi skuldir lækki um 2,1 milljarð króna, handbært fé aukist um 7,2 milljarða og fjárfesting í Sp/f Orkufelaginu verði allt að 2,9 milljarðar króna. Eigið fé mun hækka um um það bil 6 milljarða króna miðað við ofangreindar forsendur.

Kauptilboðið er með fyrirvara um samþykki viðeigandi eftirlitsaðila og lokafrágang skjala. Áætlað er að viðskiptunum ljúki endanlega í nóvember en við lokafrágang verður nánar greint frá fjárhagslegum áhrifum og aðkomu Skeljungs að Sp/f Orkufelaginu.

Stikkorð: Skeljungur P/F Magn