*

sunnudagur, 29. nóvember 2020
Innlent 7. október 2020 10:32

Góði hirðirinn opnar netverslun

Smartmedia aðstoðaði Góða hirðinn við að setja upp netverslun. Fóru að selja á facebook í fystu bylgju heimsfaraldursins.

Ritstjórn
Ruth Einarsdóttir er rekstrarstjóri Góða hirðisins.
Aðsend mynd

Netverslun Góða hirðisins opnaði í morgun á slóðinni www.godihirdirinn.is. Góði hirðirinn er ekki alveg grænn í sölu á netinu því netsala hófst á Facebooksíðu Góða hirðisins þegar fyrsta bylgja Covid-19 reið yfir. Viðtökurnar voru svo góðar að því var haldið áfram eftir að fyrsta bylgjan gekk niður segir í tilkynningu.

Ruth Einarsdóttir, rekstrarstjóri Góða hirðisins, segir að netverslunin sé rökrétt skref fyrir Góða hirðinn. Hagnaðarvon er ekki það sem ýti undir þessa starfsemi. Góði hirðirinn er ekki rekinn í hagnaðarskyni heldur til að stuðla að sjálfbærni með því að veita notuðum hlutum framhaldslíf og draga þannig úr sóun og úrgangsmyndun.

„Með netversluninni getum við náð meiri árangri á sviði sjálfbærni með aukinni þjónustu við viðskiptavini okkar. Netverslunin er ekki síður mikilvæg í baráttunni við Covid-19 og nauðsynleg svo við getum unnið að markmiðum okkar á þessum tímum,“ segir Ruth.

„Netverslun Góða hirðisins er því bæði skref í átt að meiri sjálfbærni og á sama tíma þjónusta við fólk sem treystir sér ekki til að mæta í verslunina okkar í Fellsmúla. Með netversluninni viljum við gera enn betur, bæði á sviði sjálfbærni og smitvarna.“

  • Skjáskot af nýrri netverslun Góða hirðisins

Betri árangur með eiginlegri netverslun

Fulltrúar Smartmedia komu að máli við forsvarsmenn Góða hirðisins fyrir nokkrum mánuðum þegar þau sáu að hægt væri að ná meiri árangri í netsölu með eiginlegri netverslun. Arnar Jónsson, sölustjóri Smartmedia, segir fyrirtækið stolt af því að geta stuðlað að aukinni sjálfbærni með samstarfi við Góða hirðinn.

„Við komum að verkefninu á forsendum sjálfbærni og samfélagsábyrgðar. Það eru forréttindi að geta stutt við starfsemi þar sem fólk vinnur af heilum hug við að draga úr sóun og stuðla að betri framtíð fyrir komandi kynslóðir,“ segir Arnar.

Viðskiptavinir Góða hirðisins geta keypt valdar vörur í öruggri netverslun og sótt keyptar vörur næstu tvo laugardaga eftir kaupin. Verslun Góða hirðisins í Fellsmúla 28 verður að sjálfsögðu áfram opin þó svo að samkomutakmarkanir setji strik í reikninginn næstu vikur.

Lykilhluti af hringrásinni

Góði hirðirinn selur notaða hluti sem fólk skilar á endurvinnslustöðvar SORPU með það að markmiði að draga úr sóun. Netverslunin er ný leið að þessu mikilvæga markmiði Góða hirðisins.

Góði hirðirinn kom um 700 tonnum af notuðum vörum aftur inn í hringrásarhagkerfið á árinu 2019 með tilheyrandi ábata fyrir umhverfið og viðskiptavini Góða hirðisins. Með netversluninni er stefnt að því að þessi tala fari hækkandi.

Góði hirðirinn er hluti af stuðningi SORPU við hringrásarhagkerfið. Endurnot notaðra hluta er ein besta leiðin til að draga úr sóun, losun gróðurhúsalofttegunda og ágangi á auðlindir. Árangur Góða hirðisins er því ekki mældur í krónum og aurum heldur í árangri á sviði sjálfbærni.

Þær krónur sem eru eftir í kassanum þegar árið er gert upp eru því gefnar. Góði hirðirinn hefur þannig stutt við góðgerðamál undanfarin tuttugu ár.