Marel mun greiða hluthöfum fyrirtækisins arð sem nemur 2,14 evru sentum á hlut fyrir síðasta rekstrarár. Heildararðgreiðsla fyrirtækisins nemur því um 15,3 milljónum evra eða um 1,7 milljörðum króna. Arðgreiðslutillaga stjórnar Marels var samþykkt á aðalfundi fyrirtækisins í gær, en arðgreiðslan samsvarar um 20% af hagnaði síðasta árs. Arðurinn verður greiddur út í krónum þann 23. mars næstkomandi en hluthafar geta óskað eftir því að arðurinn verði greiddur í evrum.
Að auki veitti stjórn Marel stjórnendum félagsins heimild til að kaupa eigin bréf fyrir allt að 15 milljónir evra á árinu 2017 sem nýta má til greiðslu í hugsanlegum yfirtökum í framtíðinni.
Dagurinn í dag er því arðleysisdagur (e. ex-dividend date), þar sem viðskipti hefjast með bréf Marels án réttar til arðs vegna reikningsársins 2016.
Stefna Marel er að hlutfall hreinna vaxtaberandi skulda og EBITDA sé 2-3 sinnum EBITDA og að umframfjármagn sé varið til vaxtar, virðissköpunar og arðgreiðslna. Arðgreiðslu- og endurkaupsmarkmið fyrirtækisins er á bilinu 20-40% af hagnaði. Stærstu hluthafar Marels eru Eyrir Invest með 29,3% hlut, Lífeyrissjóður verslunarmanna með um 9,1% hlut og Gildi Lífeyrissjóður með 7% hlut. Gildi Lífeyrissjóður sat hjá í atkvæðagreiðslum fundarins.
Þá var stjórn félagsins endurkjörin og hana skipa Ann Elizabeth Savage, Arnar Þór Másson, Ásthildur Margrét Otharsdóttir, Ástvaldur Jóhannsson, Helgi Magnússon, Margrét Jónsdóttir og Ólafur Steinn Guðmundsson. Ásthildur Margrét Otharsdóttir verður áfram stjórnarformaður.
Árni Oddur Þórðarson, forstjóri Marels, greindi hluthöfum frá rekstrarári síðasta árs á fundinum. Árið 2016 var eitt það besta í sögu fyrirtækisins og jókst hagnaður um 34% milli ára í 143,5 milljónir evra. Þá fór hann einnig yfir framtíðarsýn og stefnu fyrirtækisins, en Marel stefnir á 12% árlegan meðalvöxt á næstu 10 árum, borið saman við 4-6% áætlaðan markaðsvöxt.
