„Ég vakna aldrei seinna en kl. 6 á morgnana. Ef ég fer í ræktina eða sund áður en ég fer í vinnu, eins og ég reyni að gera þrisvar í viku, þá vakna ég fyrr,” segir Guðmundur Benedikt Þorsteinsson, öryggisfulltrúi hjá Alcoa – Fjarðaáli. Guðmundur Benedikt býr í Neskaupstað ásamt konu sinni, Kristínu Ellu Guðmundsdóttur, og þremur börnum, Ásrúnu Ingibjörgu, fimm ára, Benedikt Helga, þriggja ára og Friðriku Maríu, 7 mánaða.
Guðmundur Benedikt tekur rútu í vinnuna á hverjum einasta morgni: „Rútan sem flytur mig yfir Oddsskarðið fer samviskusamlega klukkan 06.50 af stað. Kristín Ella sér þess vegna um að ræsa börnin og koma þeim öllum á þrjá mismunandi staði áður en hún getur farið að sinna náminu sínu, en hún er að klára þroskaþjálfanám í fjar námi við Háskóla Íslands. Ásrún Ingibjörg er á leikskólanum inni í sveit, Benedikt Helgi er á leiksólanum inni í bæ, og þá morgna sem tengdamamma er í fríi fer Friðrika María þangað í pössun.”
Yfir vetrartímann er nánast alltaf snjór á Oddsskarðinu að sögn Guðmundar Benedikts nema þegar það er hálka: „Menn eru alveg hættir að vera hræddir við þessa leið, en það er líklega bara vegna þess að við erum orðin svo vön þessu. Í fyrrasumar komu systir mín og mágur í heimsókn og þau voru dauðskelkuð að keyra þetta. Þau ættu bara að prófa það í 25 metrum og hálku."
Nánar er fjallað um málið í sérblaðinu Orka og iðnaður, sem fylgir Viðskiptablaðinu. Áskrifendur geta nálgast blaðið undir liðnum tölublöð hér að ofan.