Landsvirkjun undirritaði í dag samning um útgáfu skuldabréfa fyrir 100 milljónir Bandaríkjadala eða sem svarar til rúmra 11,2 milljarða íslenskra króna. Útgáfan er tvíþætt, annars vegar að fjárhæð 50 milljónir Bandaríkjadala til fimm ára og hins vegar 50 milljónir dala til sjö ára. Bréfin bera breytilega millibankavexti á bandaríkjamarkaði auk 3,5% vaxtaálags. Kaupandi bréfanna er Landsbankinn.
© Aðsend mynd (AÐSEND)
Þetta kemur fram í fréttatilkynningu frá Landsvirkjun. Í fréttatilkynningunni segir ennfremur:
„Eins og fram hefur komið er fyrirvari í lánasamningi Landsvirkjunar og Evrópska fjárfestingarbankans (EIB) um lánshæfi ríkissjóðs. Þessari skuldabréfaútgáfu er ætlað að tryggja fjármagn til Búðarhálsvirkjunar óháð niðurstöðu erlendra matsfyrirtækja á lánshæfi Ríkissjóðs Íslands. Lánið frá EIB verður nýtt um leið og aðstæður leyfa.
Hörður Arnarson, forstjóri Landsvirkjunar segir útgáfuna mjög jákvæða fyrir fyrirtækið:
„Það er mikilvægt fyrir Landsvirkjun að hafa aðgang að fjölbreyttum fjármögnunarkostum. Afar ánægjulegt er að Landsbankinn og Landsvirkjun hafi getað sameinað krafta sína til að tryggja framgang þessa mikilvæga verkefnis sem Búðarhálsvirkjun er.“
Steinþór Pálsson, bankastjóri Landsbankans segir mikilvægt að nýta styrk bankans til að byggja upp íslenskt efnahagslíf:
,,Fjárhagslegur styrkur Landsbankans og langtíma fjármögnun í erlendum myntum gerir bankanum kleift að styðja með myndarlegum hætti við Landsvirkjun og taka þátt í stórum framkvæmdum á borð við Búðarhálsvirkjun. Forsvarsmenn Landsbankans hafa lýst þeim vilja sínum að vera hreyfiafl og nýta styrk bankans til að hraða uppbyggingu íslensks efnahagslífs og þetta verkefni fellur mjög vel að þeirri stefnumörkun.“
