Fiskistofa hefur birt að venju upplýsingar um kvótahæstu útgerðirnar á nýbyrjuðu fiskveiðiári. Fram kemur að litlar breytingar hafi orðið á röð efstu útgerðanna frá því hliðstæðar upplýsingar voru birtar í mars sl. í kjölfar úthlutunar á aflamarki í deilistofnum og viðbótarúthlutunar í loðnu. Þetta kemur fram í frétt Fiskifrétta um málið.
Eins og undanfarin ár eru HB Grandi og Samherji í tveimur efstu sætunum. HB Grandi er með um 11% af hlutdeildunum en var í mars með 10,8%. Samherji er með 6,2%. Samanlagt ráða þessi tvö stærstu útgerðarfyrirtæki landsins því yfir 17% af hlutdeildunum í kvótakerfinu. Vinnslustöðin í Vestmannaeyjum fellur frá fyrri hluta ársins úr 4. í 6. sæti listans yfir stærstu útgerðarfyrirtækin en annars eru breytingar litlar á toppi listans.
