Í gær héldu Bandaríkjamenn upp á forsetadaginn svokallaða, sem lengi var haldinn hátíðlegur á afmælisdegi George Washington, fyrsta forseta Bandaríkjanna, en er nú haldinn hátíðlegur á þriðja mánudegi í febrúar. Af þessu tilefni tók vefmiðillinn Huffington Post saman tölur um auð allra Bandaríkjaforseta frá Washington til Obama.
Af núverandi og fyrrverandi forsetum er Bill Clinton eini forsetinn sem er á topp tíu listanum. Svo er umdeilt hvernig eigi að flokka John F. Kennedy, því þótt fjölskylda hans hafi verið - og er reyndar enn - afar auðug þá erfði hann sjálfur ekkert eftir föður sinn, heldur naut hann góðs af sjóði sem settur hafði verið upp fyrir fjölskyldumeðlimina.
Listinn er byggður á sambærilegum lista sem unninn var árið 2010 af vefsíðunni 24/7 Wall St. og eru fjárhæðirnar miðaðar við það ár, en Huffington Post uppfærði eignir núlifandi manna. Þá sveifluðust eignir sumra forsetanna mjög mikið, einkum fyrstu forsetanna. Í tilvikum látinna forseta er því miðað við eignirnar eins og þær voru mestar. Frægt er til dæmis að þrátt fyrir að Thomas Jefferson sé hér í öðru sæti yfir auðuga forseta þá var hann stórskuldugur maður þegar hann lést og hafði þá sóað auðnum öllum.
Tíu ríkustu forsetar Bandaríkjanna samkvæmt samantekt Huffington Post og 24/7 Wall St.
- George Washington (1. forsetinn) 525 milljónir dala.
- Thomas Jefferson (3. forsetinn) 212 milljónir dala.
- Theodore Roosevelt (26. forsetinn) 125 milljónir dala.
- Andrew Jackson (7. forsetinn) 119 milljónir dala.
- James Madison (4. forsetinn) 101 milljónir dala.
- Lyndon Baines Johnson (36. forsetinn) 98 milljónir dala.
- Herbert Clark Hoover (31. forsetinn) 75 milljónir dala.
- Franklin Delano Roosevelt (32. forsetinn) 60 milljónir dala.
- William Jefferson Clinton (42. forsetinn) 55 milljónir dala.
- John Tyler (10. forsetinn) 51 milljónir dala.
Svo má bæta við að George W. Bush yngri er í ellefta sæti með 35 milljónir dala, George H. W. Bush faðir hans er í fjórtánda sæti með 23 milljónir, Jimmy Carter er í 22. sæti með sjö milljónir dala og Barack Obama er í 23. sæti með sömu fjárhæð.