Breska þingið samþykkti í gærkvöld að fela Theresu May, forsætisráðherra, að leitast við að semja á ný við Evrópusambandið um útgöngu, með það sérstaklega fyrir augum að fá hinni umdeildu írsku varaáætlun (e. backstop plan) breytt.
Þá var samþykkt þingsályktunartillaga þess efnis að þingið vildi ekki ganga úr sambandinu samningslaust, en ályktunin hefur lítil stjórnskipuleg áhrif, hún er ekki bindandi að neinu leyti, og kemur ekki í veg fyrir samningslausa útgöngu þann 29. mars næstkomandi, hafi ekki náðst samkomulag um annað fyrir þann tíma.
Þrátt fyrir lítil formleg áhrif dugði ályktunin þó Jeremy Corbyn, leiðtoga verkamannaflokksins og stjórnarandstöðunnar, til að hefja formlegar viðræður við May um framhaldið, en hann hefur hingað til neitað slíkum viðræðum nema May útiloki samningslausa útgöngu, sem hún hefur ekki viljað gera.
Alls kaus þingið um sjö breytingartillögur, en aðeins þær tvær ofangreindu náðu fram að ganga. Meðal þeirra sem var hafnað var tillaga stjórnarandstöðuþingmanns um að Brexit skyldi frestað ef May tekst ekki að koma samningi gegnum breska þingið.
Samstaða þingsins um næstu skref kann þó að vera skammgóður vermir fyrir May. Margir leiðtogar Evrópusambandsins hafa sagt útgöngusamninginn almennt, og þá sérstaklega írsku varaáætlunina, endanlegan og óumsemjanlegan.
Umfjöllun BBC um atkvæðagreiðslurnar í gær.
Umfjöllun BBC um næstu skref.
