Valitor semur við Advania

Greiðslukortafyrirtækið Valitor hefur samið við Advania um hýsingu, netkerfi, tengdan vélbúnað og öryggislausnir fyrir upplýsingakerfi fyrirtækisins. Fram kemur í tilkynningu að í samningnum felist m.a. tvöföldun Valitor á eigin netkerfi og hýsing hjá Advania með öruggu gagnasambandi við rammgerða vélasali á háhraðaneti. Búnaður Valitor verður hýstur í gagnaveri Thor Data Center. Það er í eigu Advania.

Í tilkynningu er haft eftir Viðari Þorkelssyni, forstjóra Valitor, að tvöföldun netkerfis Valitor sé eitt stærsta skref sem íslenskt fjármálafyrirtæki hafi tekið í langan tíma.

Gagnaver Thor Data Center er starfrækt í Hafnarfirði. Það hefur tryggt sér 3,2 megawatta orku með möguleika á allt að 17 megawöttum til viðbótar.