Vátryggingafélag Íslands hf. (VÍS) er stærsti eigandi Vefpressunnar ehf. með um 33% eignarhlut. Vefpressan rekur vefmiðilinn pressan.is . Aðrir eigendur eru Björn Ingi Hrafnsson (26,37%), Salt Investment (23,08%) og Arnar Ægisson (17,58%).
Þetta kemur fram í ársreikningi Vefpressunnar vegna ársins 2009 sem skilað var inn til ársreikningaskrár 17. september síðastliðinn.
VÍS er að fullu í eigu Existu, sem var tekið yfir af kröfuhöfum félagsins fyrir skemmstu. Áður en það gerðist voru aðaleigendur Existu bræðurnir Lýður og Ágúst Guðmundssynir. Salt Investment er í eigu athafnamannsins Róberts Wessman.
Tapaði 30,3 milljónum króna
Pressan.is fór í loftið 28. febrúar 2009. Alls námu rekstartekjur miðilsins 22,3 milljónum króna en rekstrargjöld 53 milljónum króna. Þar munar mestu um aðkeypta þjónustu sem greitt var fyrir 29,9 milljónir króna. Alls fóru um 7,2 milljónir króna í laun.
Innborgað hlutafé nam 44,5 milljónum króna á árinu en ekki kemur fram í ársreikningi hversu mikið hver borgaði inn í félagið. Eigið fé stóð í 14,2 milljónum króna og alls námu skammtímaskuldir Vefpressunar um 12 milljónum króna á síðasta ári.
