Fjárhags- og launanefnd samþykkti á dögunum tillögu bæjarstjóra um sérstaka launauppbót til starfsfólks bæjarins. Öllu starfsfólki að bæjarstjóra undanskildum verður greidd 120.000 króna eingreiðsla. Greiðslan sem tekur mið af starfshlutfalli og verður greidd út á degi verkalýðsins þann 1. maí næstkomandi. Þetta kemur fram í tilkynningu frá sveitafélaginu.
„Bærinn vill með þessu umbuna starfsfólki sínu fyrir að viðhalda framúrskarandi þjónustu á stofnunum bæjarins við krefjandi aðstæður. Á sama tíma og mannekla og álag á mörgum stofnunum nágrannasveitarfélagana hefur komið niður á þjónustunni, einkanlega í leikskólum og grunnskólum, hafa starfsmenn hér staðið saman um að leysa málin frá degi til dags og án þess að ástandið hafi komið niður á bæjarbúum. Hér hefur skólum ekki verið lokað eða börn send heim og ég tel mikilvægt að slíkt sé metið,” segir Jónmundur Guðmarsson, bæjarstjóri í tilkynningunni.
Jafnframt kemur fram að aðgerð þessi miði að því að tryggja stöðugleika í starfsmannahaldi bæjarins á óróleikatímum á vinnumarkaði.
Síðastliðið haust var samþykkt að nýta heimild í kjarasamningi leikskólakennara um tímabundin viðbótarlaun vegna markaðsaðstæðna. Heimildin var nýtt til að bregðast við markaðsaðstæðum og vanda við mönnun leikskóla.
Á sama tíma var leik- og grunnskólastjórum heimilað að greiða ófaglærðu starfsfólki yfirvinnu vegna tímabundinna aukinna verkefna og álags sem skapaðist í skólum vegna starfsmannaeklu.
Í desember samþykkti bæjarstjórn einnig að greiða öllu starfsfólki bæjarins eingreiðslu að fjárhæð kr. 30.000 til að bregðast við aðstæðum á vinnumarkaði.
