Heildarframleiðsluvirði landbúnaðarins nam 61,5 milljörðum króna á grunnverði í fyrra. Þetta er 4,3% aukning frá árinu 2012, samkvæmt bráðabirgðaniðurstöðum Hagstofunnar. Inni í tölunum eru upplýsingar um vörustyrki, en að frátöldum vörusköttum. Aðfanganotkun er talin hafa numið 44,2 milljörðum króna á árinu sem var 4,7% aukning á milli ára.
Fram kemur um málið á vef Hagstofunnar að magnbreyting framleiðslu geirans árið 2013 er hverfandi og vöxturinn nær alfarið vegna verðbreytinga. Breytingu á notkun aðfanga má rekja til rúmlega 1% magnminnkunar og um 5,8% hækkunar á verði.
Þetta er annað skiptið sem Hagstofan gefur út hagreikninga landbúnaðarins. Verkefninu var komið á laggirnar með IPA-styrk frá ESB en nú hafa íslensk stjórnvöld tekið yfir fjármögnun þess.
Á vef Hagstofunnar segir:
„Framleiðsluverðmæti landbúnaðarins árið 2012 er metið 59 milljarðar á grunnverði og er það heildaraukning um 11,1% frá fyrra ári. Þessa aukningu má rekja til 2,7% magnaukningar og 8,2% hækkunar á verði. Framleiðsluverðmæti nytjaplantna, að heimanotuðu fóðri meðtöldu, reyndist 16,9 milljarðar eða 17,7% hærra en fyrra ár. Verðmæti afurða kornræktar jókst um 59,4% frá árinu á undan, fóðurjurta um 17,1%, garðyrkjuafurða um 8,3% og kartaflna um 27,6%. Framleiðsluverðmæti afurða búfjárræktar jókst um 9,1% árið 2012 og er metið á 39,1 milljarð. Veigamestu afurðirnar eru eins og verið hefur mjólk og kindakjöt, þar sem framleiðsluverðmæti jókst um annars vegar 5% og hins vegar 7,5%.
Aðfanganotkun jókst um 13,7%, í 42,2 milljarða. Magnaukningin reyndist 3,9% eða nokkuð meiri en sem nemur aukningu framleiðslunnar. Í samræmi við umfang búfjárræktarinnar í íslenskum landbúnaði er fóðurnotkun veigamesti liður í aðföngunum með upp undir helmings hlut. Líkt og í framleiðsluverðmæti nytjaplantna er hér verðmæti heimaræktaðs fóðurs meðtalið. Aukning aðfanga stafar að miklu leyti af hækkun innflutningsverðs á korni sem hefur bæði áhrif á aðkeypt fóður, sem og á mat verðmætis heimafengins fóðurs.“
