Hver ertu?
Gísli Galdur Þorgeirsson, 24 ára, tónlistarmaður og plötusnúður.
Hvað ertu með mikla peninga í veskinu?
21 krónu.
Ertu með mörg kreditkort?
Ég er yfirleitt með eitt í gangi, nema kannski þegar maður er á viðskiptaferðalögunum. Þá er ég yfirleitt með 4-6 kreditkort.
Viðskiptabankinn þinn?
Glitnir og Arab Bank í Sviss eru þeir sem ég hef verið í mestu sambandi við. Ég er samt að fara að hætta hjá þeim.
Ertu eyðslukló?
Stundum.
Leggurðu fyrir?
Já, ég á digra sjóði í erlendum bönkum og síðan safna ég líka gullpeningum eins og Jóakim aðalönd.
Hefurðu átt í fjárhagslegum erfiðleikum?
No comment.
Áttu þitt eigið húsnæði?
Já.
Áttu sumarbústað?
Já, nokkra.
Fjárfestirðu í hvoru tveggja hlutabréfum og skuldabréfum eða öðru hvoru?
Já já já... síðan eru hlut-skuldabréfin líka að koma ansi sterk inn.
Hver er versta fjárfestingin þín?
Allar þær ömurlegu plötur sem maður hélt að væru frábærar og hefur sankað að sér í gegnum tíðina.
Hver er besta fjárfestingin þín?
Fyrsti SL-1200 Technics plötuspilarinn minn.
Sérðu um fjármálin sjálfur eða gerir það einhver fyrir þig?
Ég treysti aðstoðarmanni mínum; Eyvind Gunfred-Manfredson, fyrir öllum mínum málum.
Sérðu sjálfur um skattframtalið?
Já, því að það er það eina sem að Eyvind getur ekki gert.
Í hvað eyðirðu of miklu?
Skó, snekkjur, kampavín og hljóðgervla.
Hver er mesti munaðurinn sem að þú hefur leyft þér?
Við strákarnir í Motion Boys leigðum einu sinni þrjár hæðir á hóteli í Texas að mig minnir. Efsta hæðin var jafnframt toppurinn á húsinu þar sem við lágum síðan í heitum potti, dreyptum á dýru kampavíni og borðuðum jarðarber eftir vel lukkaða tónleika.
Í hvað ætlarðu að eyða næst?
Var að spá í að redda mér svona c.a 230 krónum og fá mér kaffi.
Finnur þú fyrir lækkun virðisaukaskatts á matvælum?
Nei, þetta er kjaftæði. Mér finnst eins og allstaðar séu hlutirnir bara að hækka ef eitthvað er. Það þarf að fara að gera eitthvað í þessu verðlagi hérna!