Nafnávöxtun Festu lífeyrissjóðs var 8,8% á árinu 2007, sem jafngildir 2,9% raunávöxtun. Hrein raunávöxtun, þegar tillit er tekið til rekstarkostnaðar er 2,8%.
„Afkoma sjóðsins verður að teljast afar góð í ljósi þeirra miklu lækkana sem urðu á bæði innlendum og erlendum hlutabréfum síðla árs 2007,“ segir í tilkynningu frá félaginu.
Í árslok 2007 var hrein eign til greiðslu lífeyris um 55,3 milljarðar og hækkaði hún um 6,7 milljarða, eða 13,7% á milli ára.
Iðgjöld ársins námu 3.5 milljörðum, sem er rúm 24% aukning frá fyrra ári. Til sjóðsins greiddu á árinu um 16 þúsund sjóðfélagar hjá 1.934 launagreiðendum. Lífeyrisgreiðslur námu 1.3 milljörðum, en það er tæp 13% hækkun frá fyrra ári. Lífeyrisþegar voru 4.524.
Meðaltal hreinnar raunávöxtunar síðustu 5 ára er 7,9% og er þá ávöxtun þeirra sjóða sem að Festu lífeyrissjóði standa, hlutfölluð m.v. hreina eign þeirra í lok áranna 2003-2005.
Ávöxtun séreignardeildar sjóðsins var 5,6%, sem jafngildir -0,2% raunávöxtun. Hrein raunávöxtun var -0,3%. Eignir séreignardeildar eru allar gerðar upp á markaðskröfu. Hrein eign séreignardeildar var 131 milljón í árslok.
Í árslok 2007 voru 51% fjárfestinga sjóðsins með breytilegum tekjum (hlutabréf og sjóðir), 48% með föstum tekjum (skuldabréf) og 1% í bundnum innlánum. Rúm 26% fjárfestinga var í erlendri mynt.
Samkvæmt tryggingafræðilegri úttekt sem miðast við stöðu sjóðsins í lok árs 2007 eru eignir sjóðsins 12,5% umfram áfallnar skuldbindingar og 3,2% umfram heildarskuldbindingar, segir í tilkynningunni.
