*

laugardagur, 18. september 2021
Innlent 5. mars 2020 07:05

Bakkavör lokar í Wuhan

Kórnuveiran og faraldurinn í Kína hefur áhrif á starfsemi Bakkavarar — markaðsvirði lækkað um 44% á tveimur árum.

Trausti Hafliðason
Ágúst Guðmundsson, stjórnarformaður Bakkavarar.
Birgir Ísl. Gunnarsson

Miklar sveiflur hafa verið á gengi hlutabréfa í matvælafyrirtækinu Bakkavör, sem er í meirihlutaeigu bræðranna Lýðs og Ágústs Guðmundssona. Bakkavör er skráð á markað í Bretland og við lokun þeirra í gær stóð gengið í tæplega 106 pundum. Þann 20. febrúar var gengið 139 pund og hefur það því lækkað um 24% á tveimur vikum.

Á sama tímabili hefur FTSE-vísitalan lækkað um 9,6% og vísitala matvælaframleiðenda í kauphöllinni í London um 11,6%. Þegar Bakkavör var skráð á markað í London í lok árs 2017 kostaði hluturinn 190 pund. Í gær fór hlutabréfagengið um tíma niður í ríflega 101 pund sem er það lægsta frá skráningu.

Bræðurnir Lýður og Ágúst eiga í dag 50,16% hlut í Bakkavör í gegnum Carrion Enterprises Limited og Umbriel Ventures Limited, sem og Lixaner Co Limited. Er síðastnefnda félaginu stjórnað af Sigurði Valtýssyni, fyrrverandi forstjóra Exista og telst það tengdur aðili. Bræðurnir seldu samtals 1,11% hlut til Lixaner í maí á síðasta ári.

Markaðsvirði Bakkavarar í dag er um 618 milljónir punda en fór hæst í 1,1 milljarð punda í lok janúar 2018 en þá stóð gengi bréfanna í tæplega 213 pundum. Miðað við núverandi gengi krónunnar gagnvart pundi hefur markaðsvirðið farið úr ríflega 180 milljörðum króna í ríflega 101 milljarð. Markaðsvirði félagsins hefur því lækkað um tæp 44% síðan í byrjun árs 2018.

Bakkavör skilaði ársreikningi í lok síðustu viku. Samkvæmt honum jukust tekjurnar um 1,5% á milli ára eða úr 1.857 milljónum punda í 1.886 milljónir. Engin breyting varð á afkomu félagsins að teknu tilliti til vaxtagreiðslna og vaxtatekna, skattgreiðslna og afskrifta (EBITDA). Var hún 153,5 milljónir punda í fyrra eins og árið 2018. Hagnaður félagsins dróst hins vegar saman um 45,1% á milli ára. Fór hann úr 67,2 milljónum punda árið 2018 í 36,9 milljónir í fyrra. Meginstarfsemi Bakkavarar er á Bretlandseyjum, þar sem félagið starfrækir 25 verksmiðjur og hefur um 17 þúsund starfsmenn í vinnu. Höfuðstöðvar fyrirtækisins eru í London.

Bakkavör rekur í dag fimm verksmiðjur í Bandaríkjunum, þar sem það er með um 600 starfsmenn í vinnu og níu verksmiðjur með um 2.000 starfsmönnum í Kína. Mesti vöxturinn hefur einmitt verið á þessum mörkuðum en þar jukust tekjur Bakkavarar um tæplega 13% á milli ára og námu um 227 milljónum punda á síðasta ári.

Loka tveimur verksmiðjum

Ein af verksmiðjum Bakkavarar í Kína er í borginni Wuhan, þar sem kórónuveiran greindist fyrst fyrir rúmum tveimur mánuðum síðan.

„Útbreiðsla kórónuveirunnar hefur haft veruleg áhrif á starfsemi okkar í Kína," er haft eftir Ágústi Guðmundssyni, stjórnarformanni Bakkavarar, í tilkynningu til kauphallarinnar London vegna ársuppgjörs félagsins. Þar kemur jafnframt fram að verksmiðjunni í Wuhan, sem og verksmiðju félagsins í borginni Taicang, sem er við austurströnd Kína, hafi verið lokað tímabundið vegna kórónuveirunnar.

Nánar er fjallað um málið í Viðskiptablaðinu sem kom út í dag. Áskrifendur geta nálgast blaðið undir Tölublöð, aðrir geta skráð sig í áskrift hér