*

föstudagur, 5. júní 2020
Innlent 2. mars 2020 13:54

Bíða með að selja í Landsbanka

Stjórnvöld ætla fyrst að selja Íslandsbanka allan. Hámarkshlutur ríkisins fjarlægður og markmiðum breytt.

Ritstjórn
Bjarni Benediktsson er fjármálaráðherra og formaður Sjálfstæðisflokksins, Katrín Jakobsdóttir er forsætisráðherra og formaður VG og Sigurður Ingi Jóhannsson er samgöngu- og sveitarstjórnarráðherra og formaður Framsóknarflokksins.
Haraldur Guðjónsson

Ríkisstjórn Vinstri grænna, Framsóknarflokksins og Sjálfstæðisflokksins virðist hafa náð samkomulagi um hvernig haga eigi fyrirhugaðri sölu á eignum ríkisins í bönkunum tveimur, Landsbanka og Íslandsbanka samkvæmt nýrri eigendastefnu sem ríkisstjórnin hefur gefið út.

Kjarninn greindi fyrst frá en í tilkynningu á vef Stjórnarráðsins segir að helsta breytingin felist í því að skýra áform ríkisstjórnarinnar gagnvart einstökum félögum.

Þar kemur fram að nú sé stefnt að því að ríkið eigi verulegan eignarhlut í Landsbankanum til langframa, en í eigendastefnu ríkisins frá því í júlí 2017 sem samin var í stjórnartíð ríkisstjórnar Sjálfstæðisflokks með Viðreisn og Bjartri framtíð hafði verið gert ráð fyrir að sá hlutur yrði 34 til 40 prósent.

Í fyrri stefnu hafði jafnframt komið fram að bæði allur eignarhluturinn í Íslandsbanka og sá hluti sem selja ætti í Landsbankanum yrði seldur um leið og skilyrði til þess yrðu hagfelld, en nú segir að bíða eigi með að selja í Landsbankanum þangað til Íslandsbanki hafi verið seldur að fullu.

Loks eru forsendur fyrir eignarhaldi ríkisins í Landsbankanum breitt, úr því að vera til að stuðla að stöðugleika í fjármálakerfinu og tryggja nauðsynlega innviði þess en nú hefur verið bætt við:

„Markmiðið með eignarhaldinu er að stjórnvöld hafi ráðandi ítök í a.m.k. einni fjármálastofnun sem þjónustar almenning og fyrirtæki og hefur höfuðstöðvar hér á landi. Þannig tryggja stjórnvöld að almenn, vönduð og traust fjármálaþjónusta standi öllum til boða óháð m.a. búsetu.“