*

föstudagur, 14. ágúst 2020
Innlent 20. maí 2020 18:02

Býst ekki við frekari vaxtalækkunum

Greiningardeild Íslandsbanka telur að 0,75% stýrivaxtalækkun Seðlabankans í morgun verði sú síðasta í bili.

Ritstjórn
Haraldur Guðjónsson

Vaxtalækkunarskref Seðlabankans fyrr í dag er það stærsta sem bankinn hefur tekið frá því þokkalegur stöðugleiki komst á gengis- og vaxtamál í kjölfar fjármálakreppunnar 2008-09. Peningastefnunefnd Seðlabanka Íslands lækkaði meginvexti bankans um 0,75% í morgun

Greiningardeild Íslandsbanki telur að með lækkuninni sé peningastefnunefndin að bregðast að fullu við breyttum horfum í efnahagslífinu. Greiningardeildin á því ekki von á frekari vaxtaaðgerðum á allra næstu vikum en segir þó að meginvextirnir gætu lækkað í haust ef lægðin í ferðaþjónustu reynist dýpri og langvinnari en spá bankans gerir nú ráð fyrir. 

Í umfjöllun greiningardeildarinnar er einnig rætt um viðbrögð á skuldabréfamarkaðnum. Ávöxtunarkrafa bæði óverðtryggðra og verðtryggðra ríkisbréfa lækkuðu umtalsvert í kjölfar vaxtalækkunarinnar. 

Ávöxtunarkrafa styttri ríkisbréfaflokka hefur lækkað um 29-46 punkta það sem af er degi og er krafa þeirra nú í kring um 1,5%. Til samanburðar var slík krafa í kring um 3,3% í ársbyrjun. Þá hefur raunkrafa verðtryggðra bréfa lækkað um 9-13 punkta frá opnun markaða og er krafa styttri verðtryggðra ríkisbréfa nú rétt undir 0%.