Einar Mäntylä hefur verið ráðinn sem verkefnisstjóri og sérfræðingur í nýsköpunarmálum á vísinda- og nýsköpunarsvið Háskóla Íslands.
Í tilkynningu frá Háskólanum segir að Einar muni vinna að markvissu átaki um eflingu nýsköpunarstarfs innan Háskólans og starfa með Hugverkanefnd Háskóla Íslands og Landspítala.
Einar lauk BS-prófi í líffræði frá Háskóla Íslands 1988 og doktorsprófi í sameindaerfðafræði frá Landbúnaðarháskólanum í Uppsölum í Svíþjóð 1997. Eftir að hafa starfað sem nýdoktor í Svíþjóð í tvö ár fluttist Einar til Íslands árið 1999 og byggði m.a. upp aðstöðu til rannsókna í plöntulíftækni við Rannsóknastofnun Landbúnaðarins að Keldnaholti.
Einar er einn af stofnendum líftæknifyrirtækisins ORF Líftækni hf. sem stofnað var árið 2000 og hefur fyrirtækið unnið til ýmissa verðlauna fyrir vörur sínar. Einar hefur jafnframt hlotið viðurkenningar fyrir frumkvöðlastarf bæði innanlands og erlendis og tekið virkan þátt í nýsköpunarverkefnum innan Samtaka Iðnaðarins.
Einar starfaði sem aðjúnkt og síðar sem gestadósent við Lyfjafræðideild Háskóla Íslands frá árinu 2002 og hefur auk þess unnið og kennt við háskóla í Svíþjóð og Þýskalandi og á samnorrænum framhaldsnámskeiðum í lífvísindum. Einar hefur birt fjölda ritrýndra greina og er meðuppfinningamaður á fimm einkaleyfum. Árið 2015 lauk Einar MBA námi í nýsköpun og sprotafyrirtækjamyndun frá Tækniháskólanum í Munchen í Þýskalandi.