„Við erum með eitt hús til leigu sem er ekki til sýnis á síðunni okkar en þar kostar nóttin í kringum 100 þúsund krónur,“ segir Guðmundur Lúther Hallgrímsson, sölustjóri hjá Bungalo.is. Á síðu fyrirtækisins er að finna skrá yfir sumarhús á öllu landinu. Þangað getur fólk leitað sem vill leigja sér sumarbústað.
„Húsið er undir Eyjafjöllum og þar er svefnpláss fyrir 10 manns og í heita pottinn komast 12 manns,“ segir Guðmundur. Um ódýrustu gistinguna segir Guðmundur: „Við erum með lítinn stúdíókofa í Búðardal þar sem er svefnpláss fyrir fjóra. Nóttin í honum kostar átta þúsund krónur,“ segir Guðmundur.
Á síðunni eru bústaðir flokkaðir eftir því hvar þeir eru á landinu og hvað er í boði eins og til dæmis heitur pottur, aðgengi fyrir hreyfihamlaða eða grill.
