Lagadeild Háskólans í Reykjavík hefur hlotið 120 milljóna króna rannsóknarstyrk frá Evrópusambandinu. Um er að ræða styrk úr 7. rannsóknaráætlun Evrópusambandsins.
Þetta er langhæsti styrkur sem úthlutað hefur verið til íslensks verkefnis á sviði hug- og félagsvísinda. Þetta er einnig í fyrsta sinn sem íslenskur háskóli fær styrk úr rannsóknaráætlun Evrópusambandsins vegna rannsókna í lögfræði, segir í fréttatilkynningu frá HR
Þórdís Ingadóttir, dósent við lagadeild Háskólans í Reykjavík, stýrir verkefninu í heild. Samstarfsskólar Háskólans í Reykjavík eru Amsterdam University , Hebrew University í Jerúsalem og University College London .
Verkefnið ber heitið Impact of International Criminal Procedures on Domestic Criminal Procedures in Mass Atrocity Cases . Í því er leitast við að meta áhrif alþjóðlegs refsiréttar og alþjóðadómstóla á landsrétt í málum er varða gróf og víðtæk mannúðar- og mannréttindabrot. Markmiðið er að efla samspil landsréttar og þjóðaréttar á þessu sviði, auka áhrif og virkni alþjóðadómstóla og bæta þar með viðbrögð landsréttar við slíkum brotum. Verkefnið stendur yfir í þrjú ár, frá 2008 til 2010.
