*

föstudagur, 14. maí 2021
Fólk 20. apríl 2021 11:13

Fjórir nýir forstöðumenn hjá Skeljungi

Guðrún Nielsen, Ingi Fannar Eiríksson, Sæþór Árni Hallgrímsson og Unnur Elva Arnardóttir eru nýir forstöðumenn hjá Skeljungi.

Ritstjórn
Á efri hluta myndarinnar eru Guðrún Nielsen og Ingi Fannar Eiríksson. Sæþór Árni Hallgrímsson og Unnur Elva Arnardóttir eru á neðri hluta myndarinnar.
Aðsend mynd

Fjórir starfsmenn innan Skeljungs hafa tekið við nýjum stöðum sem forstöðumenn hjá fyrirtækinu. Ráðningarnar koma í kjölfar nýlegra skipulagsbreytinga sem gerðar voru hjá Skeljungi.  

„Það er í takt við stefnu fyrirtækisins að starfsmenn eigi þess kost að þróast innan þess og taka við nýjum stöðum með aukinni ábyrgð. Þannig vill Skeljungur halda í gott og metnaðarfullt starfsfólk sem hefur áhuga á að vaxa í starfi með nýjum verkefnum,“ segir í fréttatilkynningu Skeljungs.

Guðrún Nielsen hefur tekið við starfi forstöðumanns reikningshalds á fjármálasviði Skeljungs. Guðrún hefur starfað á fjármálasviði Skeljungs frá árinu 2014 og hefur síðan þá komið að margvíslegum störfum á fjármálasviði og öðlast víðtæka þekkingu á reikningshaldi fyrirtækisins. Undanfarin þrjú ár hefur hún gegnt starfi aðalbókara og þar áður starfi innheimtustjóra. 

Ingi Fannar Eiríksson hefur tekið við starfi forstöðumanns sölu og dreifingar á fyrirtækjasviði Skeljungs. Ingi Fannar hóf störf hjá Skeljungi 2019 og gegndi áður starfi viðskipta- og sölustjóra en mun nú sem forstöðumaður tengja þekkingu sína á þörfum viðskiptavina félagsins við þjónustu og dreifingu eldsneytis um land allt. Hann starfaði þar áður hjá Íslandsbanka í tæp tólf ár, meðal annars á útibúa- og fyrirtækjasviði, síðast í sjávarútvegsteymi bankans, og þar á undan vann hann meðal annars við sjómennsku og vélvirkjun. 

Sæþór Árni Hallgrímsson hefur verið ráðinn forstöðumaður framkvæmda á einstaklingssviði en áður starfaði Sæþór sem verkefnastjóri á rekstrarsviði félagsins, sem hefur verið lagt niður. Hann hefur yfirgripsmikla þekkingu á þeim verkefnum sem nú tilheyra undir hann en Sæþór hefur m.a. starfað sem þjónustustjóri hjá Olíudreifingu á árunum 2011-2015 og þar áður sá hann um verkefnastjórn viðhalds og uppsetningu á tækni- og afgreiðslubúnaði í tvö ár hjá Skeljungi. 

Unnur Elva Arnardóttir hefur verið ráðin forstöðumaður innri og ytri þjónustu á fyrirtækjasviði Skeljungs. Áður gegndi Unnur Elva starfi viðskipta- og sölustjóra hjá Skeljungi eða frá því hún hóf störf hjá fyrirtækinu fyrir þremur árum. Í því starfi öðlaðist hún mikla innsýn í þarfir einstaklinga og fyrirtækja á orkumarkaði. Unnur Elva starfaði áður hjá Símanum sem deildastjóri fyrirtækjasviðs í sex ár og þar áður hjá Vodafone (Sýn), bæði sem viðskiptastjóri og síðar sem deildarstjóri heildsölu í fjögur ár.