Velta á fasteignamarkaði á höfuðborgarsvæðinu jókst lítillega á milli vikna í vikunni, eða um 5%, en hafði í vikunni á undan lítið breyst á milli vikna.
Þannig nam veltan í vikunni 1.638 milljónum króna samkvæmt gögnum frá Fasteignaskrá Íslands og hefur ekki verið meiri frá því í byrjun maí, en í vikunni á undan nam veltan 1.556 milljónum króna.
Fjögurra vikna meðalvelta hækkar milli vikna, þriðju vikuna í röð. Þannig nemur fjögurra vikna meðalvelta nú 1.491 milljón króna og hefur ekki verið jafn há frá því um miðjan maí. Mest hefur fjögurra vikna meðalvelta verið tæpir 1,6 milljarðar á þessu ári en það var um miðjan maí.
Til að sjá betur heildarmyndina af fasteignamarkaðir má sjá þróun fjögurra vikna meðalveltu á milli ára á myndinni hér að ofan. Þar sést að fjögurra vikna meðalvelta hefur nú lækkað um 32% milli ára en á sama tíma í fyrra hafði fjögurra vikna meðalvelta lækkað um 70% milli ára.
Tólf vikna meðalvelta hækkar enn á milli vikna, níundu vikuna í röð, nú um 33 milljónir króna, og nemur 1.250 milljónum króna. Tólf vikna meðalvelta hefur þó dregist saman um 46% milli ára en hafði á sama tíma í fyrra dregist saman um 64% milli ára.
Ársbreyting á vikuveltu hefur dregist saman 29%. Rétt er þó að hafa í huga að velta á fasteignamarkaði getur sveiflast nokkuð milli vikna og því er réttara að skoða fleiri vikur saman líkt og gert er hér að ofan.
Til gamans má þó skoða meðalveltu á viku síðustu 12 mánuði. Hún er í dag 1.173 milljónir króna, og hefur lækkað jafnt og þétt s.l. 24 vikur, samanborið við 2.989 milljónir króna á sama tíma í fyrra og hefur því lækkað um 61% milli ára.
Í þessari viku:
Alls var 53 kaupsamningum þinglýst í vikunni, líkt og í síðustu viku, sem er talsvert yfir meðallagi en alls hefur 37 samningum verið þinglýst að meðaltali á viku á þessu ári.
Meðalupphæð á hvern samning hækkar lítillega milli vikna og nemur nú 30,9 milljónum króna, samanborið við 28,8 milljónir króna í vikunni á undan. Meðalupphæð á hvern samning frá áramótum er nú 32,3 milljónir króna.
