Larry Chen, sem starfaði áður sem grunnskólakennari en er nú framkvæmdastjóri fyrirtækis sem þróar kennsluhugbúnað, hefur tapað 15 milljörðum dollara, um 1.885 milljörðum króna, frá því í júní á þessu ári og eru auðæfi hans nú metin á 235 milljónir. Yahoo Finance greinir frá.
Sjá einnig: Kínversk hlutabréf í frjálsu falli
Chen sem var á tímapunkti meðal ríkustu manna heims er stofnandi, stjórnarformaður og framkvæmdastjóri Gaotu Techedu Inc. Síðan á föstudaginn hefur hlutabréfagengi fyrirtækisins fallið um 70%, í kjölfar ákvörðun kínverskra stjórnvalda um að öll kennslufyrirtæki skulu rekin án hagnaðar. Á sex mánaða tímabili hafa hlutabréf félagsins fallið um 96,6% í verði.
Ný reglugerð kínverskra stjórnvalda bannar kennslufyrirtækjum með skólanámskrá að vera rekin með hagnaði, skráð á markaði eða sækja fjármagn.
Síðastliðinn laugardag staðfesti Chen á kínverska samfélagsmiðlinum Weibo að fyrirtækið myndi fylgja reglugerð stjórnvalda og uppfylla kröfur um samfélagslega ábyrgð.
