Pantanir á fjárfestingavörum og varanlegum neysluvörum jukust um 0,8% í júní. Það er mun betri afkoma en búist hafði verið við, þar sem meðalspá greiningaraðila gerði ráð fyrir 0,3% samdrætti. Útflutningsgreinum hefur vegnað vel vegna veikingar Bandaríkjadals og hafa þessar fréttir dregið úr áhyggjum af samdrætti hjá framleiðslufyrirtækjum vestan hafs, samkvæmt Vegvísi Landsbankans.
Samdráttur í sölu á nýju húsnæði var einnig minni en búist hafði verið við í Bandaríkjunum. Þessi tíðindi ýttu undir hækkanir á mörkuðum en það sem af er degi hefur Nasdaq vísitalan hækkað um 0,8%, Dow Jones hefur hækkað um 0,1% og Standard & Poor´s hefur hækkað um 0,3%.
