*

sunnudagur, 17. nóvember 2019
Innlent 17. maí 2017 08:08

H&M vörurnar dýrari á Íslandi

Ef marka má verðmerkingar í verslunum fyrirtækisins erlendis virðist muna miklu á verðinu milli gjaldmiðla.

Ritstjórn
Aðrir ljósmyndarar

Verslanir H&M fatakeðjunnar í Noregi eru þegar farnar að setja á merkimiða sína verð á vörunum í íslenskum krónum, enda stefnir fyrirtækið á að opna þrjár verslanir hér á landi, þá fyrstu komandi haust í Smáralindinni eins og Viðskiptablaðið hefur fjallað um.

Ef verðið á nokkrum mismunandi vörum eru bornar saman sést að hvítir skór sem kosta 199 norskar krónur í Noregi, eru skráðar á 3.495 krónur á Íslandi, að því er fram kemur í Vísi. Hafa skal þó í huga að engir tollar eru hér á landi á fötum og skóm, en í Noregi er tollur á barnafatnaði en ekki barnaskóm.

Samkvæmt núverandi gengi gerir það verð í norskum krónum þó 2.411 krónur, sem er 45% hærra verð en í norsku krónunum. Einnig er vísað í barnabol sem kostar 79,90 norskrar krónur, sem mun kosta 1.490 krónur á Íslandi samkvæmt verðmerkingum. En norska verðið jafngildir þó 968 íslenskum krónum svo verðið hér á landi verður 54% hærra.

Loks er tekið dæmi af stuttbuxum sem kosta 17,99 pund og 199 norskar krónur, sem gerir eins og áður segir 2.411 íslenskar krónur ef horft er á norska verðið, en 2.386 krónur ef horft er á gengi íslensku krónunnar og breska pundsins. Hins vegar eru þær skráðar á 3.495 íslenskar krónur, sem aftur er 45% hærra en norska verðið og og 46% hærra en það breska.

Í svari H&M við fyrirspurn vegna málsins kemur fram að þó fyrirtækið lofi að vinna að því að bjóða íslenskum viðskiptavinum alltaf besta mögulega verðið sé ekki hægt að bera saman gengi gjaldmiðlanna, því það bæði sveiflist, sem og ekki komi þar kostnaður vegna flutninga og tolla og skattamála.

Stikkorð: Noregur Ísland H&M krónur verðmunur