Sálfræðitryllirinn Hún er horfin eftir Gillian Flynn var mest selda bókin hér á landi dagana 19. maí til 1. júní sl. samkvæmt metsölulista Rannsóknarseturs verslunarinnar (RV).
Bókin, sem kom út í Bandaríkjunum 2012, hefur farið sigurför um heiminn. Hún kom út í íslenskri þýðingu um miðjan maí. Bókin Lág kolvetna lífsstíllinn eftir Gunnar Má Sigfússon var í öðru sæti listans en hún var áður í efsta sæti. Lágkolvetna lífsstíllinn er þó enn sem komið er mest selda bókin það sem af er þessu ári samkvæmt lista RV.
Spennuskáldsagan Rutt úr vegi eftir Lee Child var í þriðja sæti listans á fyrrnefndu tímabili og ljósmyndabókin Iceland Small World eftir Sigurgeir Sigurjónsson í fjórða sæti. Sú bók er jafnframt næstmest selda bók ársins.
Þá fóru matreiðslubækurnar Partíréttir eftir Rósu Guðbjartsdóttur og Grillað með Jóa Fel strax í fimmta og sjötta sæti en þær komu báðar út um miðjan maí.
