Iceland Express hefur sent frá sér tilkynningu til að kynna nýja þjónustu um borð í vélum sínum. Meðal þess sem fyrirtækið býður nú farþegum sínum upp á er heilsufæði, barnabox, og ferðafélaga sem styttir fólki stundir á leið þeirra út í heim.
„Ferðafélaginn er nýtt og fullkomið afþreyingarkerfi sem Iceland Express hefur tekið í notkun. Ferðalangar geta horft á íslenskar og erlendar kvikmyndir, sjónvarpsþætti og barnaefni eða leikið tölvuleiki í Ferðafélaganum, allt eftir smekk hvers og eins. Iceland Express er þar með fyrsta lággjaldaflugfélagið í Evrópu til að bjóða upp á slíka þjónustu um borð,“ segir í tilkynningu frá félaginu.
,,Með þessum nýjungum um borð komum við enn frekar til móts við þarfir viðskiptavina okkar“ segir Matthías Imsland, forstjóri Iceland Express í tilkynningunni.
