Flugfélagið bætti nýlega við sig tveimur farþegaþotum af gerðinni Boeing 767-300 en félagið á fyrir tvær þotur sömu gerðar, þetta kemur fram í Morgunblaðinu í dag.
Nýjustu viðbætur Icelandair, sem bera einkennisstafina TF-ISP og TF-ISW, og hafa fengið nöfnin Eldgjá og Gullborg, eru framleiddar árið 1997 og voru áður í notkun hjá Flugfélaginu Air New Zealand.
Að sögn upplýsingafulltrúa komu breiðþoturnar til félagsins í vetur og hafa síðan þá verið endurnýjaðar að utan og innan samkvæmt stöðlum og útlitskröfum Icelandair. Breytingarnar voru unnar í viðhaldsstöð félagsins á Keflavíkurflugvelli og í Xiamen í suðausturhluta Kína.