Kínverski bílaframleiðandinn Geely Automotive Holdings hefur áhuga á að kaupa meirihlutann í Volvo ásamt ónefndum sænskum fjárfesti og bjóða Ford að halda eftir einhverjum eignarhlut.
Þetta kemur fram á Bloomberg fréttaveitunni og er vísað í frétt í norska blaðinu Dagens Næringsliv.
Ford Motor Co. á Volvo í dag en líklegt er að fyrirtækið selji þessa eign sína síðar á árinu, að því er Bloomberg hefur eftir Jöran Hägglund iðnaðarráðherra Svíþjóðar.
Annar bandarískur bílarisi, General Motors, vill einnig losa sig við sænska bílaverksmiðju í sinni eigu, en þar er um að ræða Saab Automobile.
Ford Motor Co. liggur ekki eins mikið á að selja og General Motors enda ekki eins illa statt fyrirtæki fjárhagslega. Ford er eini bílaframleiðandinn í Bandaríkjunum sem ekki hefur þegið aðstoð ríkisins.
General Motors hefur einnig ákveðið draga saman seglin með því að selja Open og Vauxhall í Evrópu og Hummer og Saturn deildir fyrirtækisins í Bandaríkjunum í þeirri viðleitni að grynnka á skuldum en fyrirtækið hefur tapað 88 milljörðum dollara frá árinu 2004.