„Ef þú ert með verðtryggð langtímalán þá geturðu skuldsett þig meira,“ segir Már Guðmundsson seðlabankastjóri. Hann bendir á að verðtryggingin hér hafi átt sök á óábyrgri skuldsetningu heimilanna í aðdraganda efnahagshrunsins. Innbyggður hvati til meiri áhættusækni en ella sé fólgin í verðtryggðum lánum en óverðtryggðum.
Már var gestur á fundi efnahags- og viðskiptanefndar Alþingis sem var að ljúka. Peningastefna Seðlabankans var til umræðu. Rætt var meðal annars um kosti og galla verðtryggingar og óverðtryggðra lána.
Már benti á að áhættusækni Dana með verðtryggð lán hafi sömuleiðis aukist þegar slík lán voru í boði.
Hér hafi verðtryggingin leitt til þess að neyslustig heimila landsins hafi verið komið á hættulegt stigfyrir hrun. Fólk verði að aðlaga sig og ekki gera ráð fyrir því að lán þeirra verði leiðrétt. Þeir sem geri ráð fyrir leiðréttingu dragi ekki úr áhættusækni.
