*

þriðjudagur, 28. janúar 2020
Erlent 11. desember 2019 14:28

MAX flýgur ekki á þessu ári

Boeing 737 MAX vélarnar eru þó nokkrum áföngum frá því að taka aftur á loft að sögn bandaríska flugmálaeftirlitsins.

Ritstjórn
epa

Boeing 737 MAX vélarnar sem hafa verið kyrrsettar frá því í mars munu ekki taka á loft á þessu ári. Þetta staðfesti Steve Dickson, framkvæmdastjóri bandaríska flugmálaeftirlitsins fyrr í dag. 

Dickson sagði í viðtali við CNBC fyrr í dag að það væru þó nokkrir áfangar sem átti eftir að ná áður en vélarnar gætu tekið á loft á nýjan leik en Dickson fundaði í dag með samgöngu- og innviðanefnd Bandaríkjaþings. 

Fyrr í vikunni greindi Reuters frá því að bandarísk flugmálayfirvöld byggjust ekki við því að gefa MAX vélunum grænt ljóst fyrr en í janúar á næsta ári í fyrsta lagi. Þá telja sumir embættismenn vestanhafs það muni ekki gerast fyrr en í febrúar í fyrsta lagi. Þess má geta að áætlanir Icelandair gera ráð fyrir vélunum í fyrsta lagi í mars en fyrr í dag greindi Morgunblaðið frá því að stjórnendur félagsins vinni að áætlunum sem geri ráð fyrir að vélarnar komist ekki í notkun fyrir sumarið. 

Fyrir liggur að MAX vélarnar munu ekki taka á loft fyrr en bandaríska flugmálaeftirlitið hefur gefið samþykki. Eftir það mun það taka flugfélög að minnsta kosti 30 daga við að koma þeim inn í leiðakerfi sín á nýjan leik. Þá má geta þess að í tilfelli Icelandair munu evrópsk flugmálayfirvöld einnig þurfa að veita samþykki sitt en ekki liggur nákvæmlega fyrir hve langan tíma það muni taka. 

Stikkorð: Boeing 737 MAX