Íslenska hugbúnaðarfyrirtækið Meniga hlaut verðlaun fyrir bestu tækninýjungina á ráðstefnunni Finovate Europe 2018 sem haldin var í London í síðustu viku. Á ráðstefnunni kynntu 70 útvalin fyrirtæki tækninýjungar í banka- og fjármálaþjónustu fyrir um 1,500 þátttakendum.
Í fréttatilkynningu segir að Finovate Europe er þekktasta og virtasta ráðstefna Evrópu í tækninýjungum fyrir fjármálaþjónustu og eru verðlaunin „Best of Show“ árlega veitt þeim fyrirtækjum sem talin eru skara fram úr í fjármálatækni. Meniga hefur áður hlotið hin virtu verðlaun árin 2011, 2013 og 2015. Meniga hefur þar með unnið verðlaunin fjórum sinnum á átta árum sem gerir Meniga að sigursælasta fyrirtæki sem tekið hefur þátt í ráðstefnunni frá upphafi.
Í verðlaunakynningunni kynntu Finnur Magnússon, vöruhönnuður og Haukur Ísfeld, iOS forritari, nýjustu lausn Meniga. Lausnin hjálpar bönkum að nýta gögn sín betur til að bjóða viðskiptavinum betri snjallsíma- og netbanka notendaupplifun svo sem persónumiðaðar tillögur að veitingastöðum og aðstoð við að skera niður óþarfa áskriftir.