Nyhedsavisen mælist nú útbreiddasta blað Danmerkur með 604.000 lesendur samkvæmt nýjustu mælingu Gallup. Danska fríblaðiðið 24timer, sem gefið er út af JP/Politikens Hus, er í öðru sæti með 554.000 lesendur. Að sögn Þórdísar Sigurðardóttur, stjórnarmanns í Dagsbrún Media, er þetta sérlega ánægjuleg niðurstaða. "Það er ótvírætt að það skiptir máli að vera með stærsta blaðið og að því höfum við stefnt. Þetta er mjög ánægjuleg niðurstaða," sagði Þórdís.
Samkvæmt heimildum Viðskiptablaðsins er augljóst, að sú staðreynd að Nyhedsavisen telst nú vera í danskri eigu hefur áhrif á niðurstöðuna þó stjórnendur blaðsins vilji ekki taka undir það.
Frá janúar 2007 til janúar 2008 hefur Nyhedsavisen aukið lesendafjölda sinn úr 268.000 í 604.000 lesendur sem er ríflega tvöföldun á lestri. Á sama tíma hefur Ekstra Bladet aukið lestur sinn um 6% og B.T. um 1% og 24timer hefur aukið lesturinn um 18%.
Politiken er með 487.000 lesendur og Berlingske Tidende var lesið af 297.000 lesendum. Af áskriftarblöðunum hefur lestur Berlingske Tidende fallið um 9% á einu ári. Lestur Politiken hefur dregist saman um sex prósent en Jyllands-Posten hefur fallið um fimm prósent.
Samdrátturinn er verstur hjá fríblaðinu Urban, sem er gefið upp af Det Berlingske Officin og fríblaðinu MetroXpress. Urban hefur fallið úr 579.000 í 428.000 lesendur (26%), en MetroXpress hefur fallið úr 620.000 í 501.000 lesendur (19%).
