Peningastefnunefnd Seðlabankans hefur ákveðið að halda stýrivöxtum óbreyttum í 6%. Þetta er í samræmi við spár greiningaraðila.
Í rökum vaxtaákvörðunar segir m.a. að í fyrstu mælingar á hagvexti í fyrra hafi sýnt minni vöxt en spáð var í febrúar. Hagvöxtur á árinu 2011 hafi aftur á móti verið endurmetinn til hækkunar. Áfram eru horfur á hægum efnahagsbata og eru leiðandi vísbendingar af vinnumarkaði í samræmi við það. Verðbólga reyndist hins vegar töluvert meiri í febrúar en reiknað hafði verið með. Á móti vegur hækkun á gengi krónunnar frá því í febrúar.
Árangursríkt hlé
Þá segir í rökum bankans að ákvörðun Seðlabankans um að hætta um hríð reglubundnum kaupum gjaldeyris og styðja við gengi krónunnar með inngripum á gjaldeyrismarkaði hafi, ásamt öðrum aðgerðum, reynst árangursrík. Aðgerðir bankans hafi dregið úr hættu á að sjálfuppfylltar væntingar um lækkun gengis veiki krónuna enn frekar. Þær hafi því stutt við peningastefnuna.
Þá segir orðrétt:
„Þótt heldur hafi hægt á efnahagsbatanum um sinn heldur slakinn í þjóðarbúskapnum áfram að minnka. Laust taumhald peningastefnunnar styður við efnahagsbatann. Minnki verðbólga hægar en áður var spáð þarf að draga úr slaka peningastefnunnar fyrr en ella. Áfram gildir að eftir því sem slakinn hverfur úr þjóðarbúskapnum er nauðsynlegt að slaki peningastefnunnar hverfi einnig. Að hve miklu leyti aðlögunin á sér stað með hærri nafnvöxtum Seðlabankans fer eftir framvindu verðbólgunnar, sem ræðst að miklu leyti af þróun gengis krónunnar og launaákvörðunum á komandi misserum.“
