*

þriðjudagur, 4. ágúst 2020
Innlent 7. febrúar 2020 17:43

Origo semur um hýsingu við Reykjavík DC

Origo fer með upplýsingatæknikerfi sín að hluta í grænt gagnaver Reykjavík DC, sem er meðal annars í eigu Vodafone.

Ritstjórn
Úr gagnaveri Reykjavík DC.
Aðsend mynd

Origo hefur samið við Vodafone um að hýsa hluta af upplýsingatæknikerfum sínum í gagnaveri Reykjavík DC. Áhersla Reykjavík DC er á umhverfisvæna orku og öryggi. Gagnaverið nýtir rafmagn úr 100% endurnýjanlegum orkugjöfum og uppfyllir Tier3-staðal, sem tryggir m.a. lágmarks niðritíma með varaaflslausnum. Vodafone er einn af eigendum Reykjavík DC.

„Það er mjög ánægjulegt að Origo hafi valið Vodafone um þjónustu hjá hátækniveri Reykjavík DC. Að jafn öflugt fyrirtæki og Origo ákveði að koma með lykilþjónustu sína til Reykjavík DC er staðfesting á því að gagnaverið er leiðandi á Íslandi hvað varðar gæði, öryggi og staðsetningu, en um leið hagkvæmt og umhverfisvænt. Ásamt hýsingarþjónustu tryggir Vodafone öruggar háhraðatengingar til og frá gagnaverinu fyrir Origo,“ segir Kjartan Briem framkvæmdastjóri tæknisviðs Vodafone.

Örn Þór Alfreðsson framkvæmdastjóri Þjónustulausna Origo, segir stefnu félagsins er að velja öfluga samstarfsaðila í stað þess að reka eigið gagnaver.

„Með því að flytja hluta kerfa okkar yfir til Reykjavík DC aukum við enn frekar möguleika á því að bjóða háuppitíma á hýsingarlausnum, þar sem landfræðilegur aðskilnaður er krafa. Origo hýsir ennfremur kerfi sín hjá Verne og er með hýsingarsal á Egilsstöðum,“ segir Örn Þór.

Stikkorð: Vodafone gagnaver Origo Reykjavík DC