*

fimmtudagur, 28. maí 2020
Innlent 1. apríl 2020 13:03

Segir af sér á „blóðugum vígvellinum"

Vilhjálmur Birgisson hættir sem 1. varaforseti ASÍ. Vildi, ólíkt ASÍ, tímabundið lækka mótframlag atvinnurekenda í lífeyrissjóð.

Ritstjórn
Vilhjálmur Birgisson.
Haraldur Guðjónsson

Formaður Verkalýðsfélags Akraness, Vilhjálmur Birgisson, hefur sagt af sér embætti sem fyrsti varaforseti Alþýðusambands Íslands. Kjarninn greinir frá þessu og staðfesti Drífa Snædal, forseti ASÍ, afsögn Vilhjálms í samtali við miðilinn.

Vilhjálmur viðraði í gær hugmyndir um að mótframlag atvinnurekenda í lífeyrissjóð myndi tímabundið lækka úr 11,5% niður í 8%, meðan kórónuveirufaraldurinn gengur yfir. Sagði hann jafnframt að fjölmargir atvinnurekendur hefðu farið þess á leit við stéttarfélögin að kjarasamningsbundnum launahækkunum sem taka gildi í dag, verði frestað. Sú tillaga hugnist sér ekki, en hann sé hins vegar tilbúinn til að fara aðra leið vegna skelfingarástands sem ríkir á vinnumarkaði. Sú leið byggir á fyrrnefndri tímabundinni lækkun á mótframlagi atvinnurekenda í lífeyrissjóð.

Samtök atvinnulífsins hafa átt í samtali við ASÍ til að leita leiða til að draga tímabundið úr launakostnaði fyrirtækja. Í bréfi sem SA sendi ASÍ sl. mánudag var m.a. óskað eftir því að framlag atvinnurekenda í lífeyrissjóð verði tímabundið lækkað úr 11,5% niður í 8%, sem er einmitt sama leið og Vilhjálmur lagði til. 

ASÍ hafnaði þessari tillögu SA og í kjölfar þess sagði Vilhjálmur af sér sem fyrsti varaforseti ASÍ.   

Vilhjálmur tjáir sig um málið á Facebook og segir ábyrgðarlaust að gera ekki neitt. Lækkun mótframlags tímabundið gæti hugsanlega varið störf þúsunda á íslenskum vinnumarkaði. „Það er ábyrgðarlaust að gera ekki neitt enda er vinnumarkaðurinn að breytast í blóðugan vígvöll og það bitnar eins og alltaf á almennu launafólki eins og tölur Vinnumálastofnunnar staðfesta," segir Vilhjálmur í færslunni.